Basketbolçy Maýkl Jordanyň awtografy bolan “Fleer Michael Jordan rookie card” toplumyndan kolleksiýa kartoçkasy Joopiter auksionynda 2,5 mln dollara satyldy. Bu barada ESPN habar berýär.
Bu Maýkl Jordanyň üçünji iň gymmat kartoçkasy boldy. Rekord geçen ýylyň tomsunda Upper Deck Ultimate Collection toplumyndan 2,92 mln dollara satylan kartoçka degişlidir.
“Fleer Michael Jordan rookie card” toplumy 1986-njy ýylda çykaryldy we kolleksionerleriň arasynda iň gymmatly sport toplumlarynyň biri hasaplanýar. Ol Jordanyň NBA-daky ilkinji çykyş eden ýyly bilen gabat gelmese-de, örän meşhur boldy.
Jordan 1984-nji ýylda “Çikago Bullzda” oýnap başlady. Toplum bolsa gijräk, Jordan ýyldyz bolandan soň çykdy. “Rookie” (Öwrenje) ady marketing maksatlary bilen ulanyldy, sebäbi täze oýunçylaryň kartoçkalary aýratyn gymmatly hasaplanylýardy.
Adatça, Jordanyň goly bolmadyk kolleksiýa kartoçkalarynyň bahasy 100 – 200 müň dollara barabar. Gol çekilen kartoçkalar bolsa seýrek bolup, bahasy bir million dollardan geçýär.
