27-nji iýunda ABŞ-nyň Miçigan ştatynyň Detroýt şäheriniň merkezinde dikuçardan dollar seçildi. «Fox 2 Detroit» teleýaýlymynyň habaryna görä, waka günortan şäheriň iň gatnawly çatryklarynyň birinde bolup geçipdir.
Dikuçar alty zolakly ýoluň üstünden uçup geçip, pullary töwrege seçipdir. Ýoldan geçip barýan pyýadalardyr sürüjileriň pullary ýygnap başlamagy bilen, gatnaw wagtlaýyn togtapdyr. Şeýle-de bolsa, şaýatlaryň aýtmagyna görä, hemme zat asuda bolup geçipdir. «Hiç kim urşanokdy. Bu ajaýypdy» — diýip, ýerli ýaşaýjylaryň biri gürrüň berdi.
Täsin pikir etrapda «Plant» lakamy bilen tanalýan Darrel Tomasdan gelip çykypdyr. Ol awtoýuwalganyň eýesi bolupdyr, klassyk awtoulaglara höwesek we goňşularynyň arasynda uly hormata eýe eken. Tomas Altsgeýmer keseli sebäpli aradan çykypdyr. Ölmezinden öň bu adaty bolmadyk çäräni wesýetine goşup gidipdir.
Oglunyň sözlerine görä, Tomas etrapdaky ýaşaýjylary soňky gezek begendirmek isläpdir. Umumylykda, dikuçardan 50 müň dollar taşlanypdyr.
«Ol ajaýyp kaka we etrabyň meşhur şahsydy. Ýogalmazyndan öň, soňky gezek hemmeleri begendirmek isledi» — diýip, ogly aýtdy. Ol çäräni guramaga kömek edipdi.
Bu çäre Tomasyň maşgalasynyň birnäçe nesliniň gatnaşan baýramçylyk dabarasy bilen tamamlandy. Köpler Darreliň klassyk awtoulaglara bolan söýgüsine hormat goýup, retro awtoulaglarda gelipdi.
«Onuň ady rowaýata öwrülipdi. Goý, ol hemişe ýatlansyn» — diýip, ogly sözüni jemledi. Ýygnananlar şol wagt «Ýaşasyn Plant!» diýip gygyryşýardylar.
