Kembrij uniwersiteti britaniýaly repçi Stormzä (Stormzy) hukuk boýunça hormatly doktorlyk derejesini berdi. Uniwersitet onuň ýokary okuw mekdebine girmekçi bolýan talyplara goldaw bermekde goşan goşandyny ykrar etdi diýip, The Guardian habar berýär.
Sazanda 2018-nji ýyldan bäri Beýik Britaniýadaky garaýagyz talyplara maliýe kömegini berýän stipendiýa meýilnamasyny durmuşa geçirýändigi üçin hukuk boýunça doktorlyk derejesini aldy. Stormziniň öz #Merky Foundation gaznasy we HSBC UK banky tarapyndan maliýeleşdirilýän başlangyjy esasynda 56 adam Kembrijde doly okuw tölegini we ýaşaýyş jaýyny aldy.
"Stormziniň stipendiýasy özgerdiji täsirini ýetirdi we biz bu derejäni bermek bilen, onuň işini ykrar edendigimize buýsanýarys" - diýip, Kembrijiň rektory Debora Prentis belledi.
Bu artistiň birinji haýyr-sahawat taslamasy däl. Ol garaýagyz britan ýazyjylaryny wagyz edýän #Merky Books neşirýatyny hem esaslandyrdy. Şeýle hem repçi “jemgyýetçilik aktiwi” hökmünde ösdürmegi meýilleşdirip, AFC-nyň Günorta Londondaky Croydon Athletic futbol klubyny satyn aldy.
Kembrijiň hormatly derejesi Stormziniň alan eýýäm ikinji sylagydyr. 2022-nji ýylda Ekseter uniwersiteti tarapyndan "haýyr-sahawat ugrunda we ýokary bilime elýeterliligi giňeltmekde gazanan üstünlikleri" üçin şuňa meňzeş baýrak bilen sylaglanypdy.
