Geljek ýüz ýylda dünýäde guşlaryň 500-den gowrak görnüşi ýitip biler. Beýik Britaniýanyň Reding uniwersitetiniň alymlary şeýle netijä geldiler diýip, Nature Ecology and Evolution žurnalynda çap edilen makala salgylanýan The Guardian habar berýär.
Derňew Halkara Tebigaty Goramak Bileleşiginiň (IUCN) maglumatlar bazasyna girýän guşlaryň 10 müň töweregi görnüşini öz içine aldy. Barlagyň esasy awtory Kerri Stýuart guşlaryň köp görnüşleriniň, soňky bäş asyra garanyňda, 2125-nji ýyla çenli ýok bolup biljekdigini aýtdy. Olaryň arasynda demirgazyk deňiz guşy bolan tupik, Ýewropa kepderisi we uly togdary ýaly guşlar bar. Onuň sözlerine görä, bu ekoulgamlaryň ýok bolmagyna sebäp bolup biler.
Ýok bolmagyň esasy sebäpleri tokaýlaryň çapylmagy, oba hojalyk ýerleriniň giňelmegi we howanyň üýtgemegi bilen bagly. Ähli ýaramaz täsirler dessine aýrylan ýagdaýynda-da, 250 töweregi görnüş ýitip gitmek howpy astynda diýip, Stýuart belledi.
Hünärmenler üstünlikli dikeldişiň mysaly hökmünde 1987-nji ýylda ýabany tebigatda ýitip giden kaliforniýa kondoryny agzaýarlar.
Professor Manuela Gonsales-Suares we BirdLife International-yň baş ylmy işgäri Stýuart Butçart maksatly tagallalar bolmazdan görnüşleriň köpüsini halas etmegiň mümkin däldigini bellediler.
