Xiaomi täze smartfony — Poco F7-ni hödürledi. Täze enjam mart aýynda çykarylan F7 Ultra we F7 Pro modelleriniň üstüni ýetirdi.
Smartfon 4 nm tehnologiýasynda öndürilen sekiz ýadroly Snapdragon 8s Gen 4 prosessorynda işleýär we AnTuTu testinde 2 milliondan gowrak bal toplapdyr. Modelde 6000 mm² meýdany bolan buglaşdyryjy kamera arkaly işleýän 3D Dual-Channel IceLoop sowadyş ulgamy ornaşdyrylandyr — bu Poco F seriýasyndaky iň ulusydyr.
Poco F7 modeli 12 GB operatiw ýat we 256 ýa-da 512 GB fleş ýat bilen üpjün edilýär. Smartfon 6,83 dýuýmlyk ekrana eýe bolup, onuň görkezişi 2772×1280 piksel, täzelenme tizligi 120 Hz-e çenli, ýagtylyk derejesi bolsa 3200 nit-e ýetýär. Ekran Sunlight Display 4.0 we Wet Touch Display 2.0 tehnologiýalaryny goldaýar we TÜV Rheinland tarapyndan üç ugur boýunça sertifikatlaşdyrylandyr. Ýagny, gök ýagtylygyň pes derejesi, titremezlik we döreýiş ritmlerine laýyklyk. Bu aýratynlyklar uzak wagtlyk ulanmalarda hem gözüň ýadamagynyň öňüni alýar. Ekran Corning Gorilla Glass 7i bilen goralan.
Baş kamera 50 MP-lik Sony IMX882 datçigini ulanýar (1/1,95 dýuým), optiki durnuklaşdyryş bilen üpjün edilendir. Şeýle-de, 26, 35 we 52 mm ýaly dürli fokus aralyklary bar. UltraSnap we Live Photo funksiýalary has ýokary hilli surata düşürmegi üpjün edýär. AI Beautify emeli aň funksiýasy suratlaryň hilini ýokarlandyryp, reňk tonuny, aýdyňlygyny, garşylygyny we ýagtylyk derejesini sazlap, sahnalaryň jikme-jikligini artdyrýar. Ön kamerasynyň durulygy — 20 MP.
6500 mA·s batareýasy 90 W tiz zarýadlamany (30 minutda 80 %) we 22,5 W tersine zarýadlamany goldaýar.
Enjam Xiaomi HyperOS 2 ulgamynda işleýär, WildBoost 4.0 optimizasiýa tehnologiýasy bilen üpjün edilendir. Smartfon IP68 derejesindäki gorag bilen enjamlaşdyrylan, 70 kg çenli basyşa çydamly we ekrana ornaşdyrylan barmak yzy skanerine eýe.
Poco F7 gara, ak we kümüş reňklerde elýeterlidir. Bahasy 256 GB wersiýasy üçin $399-dan başlanýar. 512 GB wersiýasynyň bahasy bolsa $449. Başlangyç satuwda enjam $339-dan elýeterli bolar.
