YouTube-yň baş direktory Nil Mohanyň sözlerine görä, YouTube Shorts-da gysga wideolaryň ortaça günlük görülme sany 200 milliarddan geçdi. Ol bu barada «2025 Cannes Lions International Festival of Creativity» festiwalyndaky çykyşynda aýtdy diýip, «TheWrap» habar berýär.
Günlük tomaşaçy sany geçen ýyl bilen deňeşdireniňde, takmynan, 186% artdy. 2024-nji ýylyň mart aýynda YouTube Shorts-daky wideolaryň ortaça günlük görülme sany 70 milliarddy. Belläp geçsek, gysga wideolar platformada ilkinji gezek 2021-nji ýylda peýda bolupdy.
Şeýle hem Mohan tomaşaçylaryň her gün telewizor arkaly YouTube-dan 1 milliard sagatdan köp wideo mazmuna tomaşa edýändigini aýtdy. Bu görkezijiler haýran galdyryjy, ýöne geň däl, sebäbi maý aýynda YouTube dört aý yzly-yzyna Nielsen-iň «The Gauge» atly hasabatynda birinji orny eýeläpdi. Bu YouTube-yň ähli striming hyzmatlarynyň we telekanallaryň arasynda iň köp tomaşa edilýän platforma öwrülendigini aňladýar. Şu aý telewizorda tomaşa edilen ähli mazmunyň 12,5%-i YouTube-a degişli bolup, bu ähli platformalaryň arasyndaky iň uly görkezijidir.
Nil Mohan şeýle-de şu tomusda YouTube-da Veo 3-üň peýda boljakdygyny mälim etdi. Veo – bu Google DeepMind tarapyndan işlenip düzülen wideo generasiýa modeli. Ol ulanyjylara emeli aň arkaly Shorts üçin fonlary we wideolary döretmäge mümkinçilik berýär.
