Kaşaň harytlaryň dünýä bazary, pandemiýa döwrüni hasaba almazdan, soňky 15 ýylda ilkinji gezek pese gaçyşy görkezdi. Bu barada Bain & Company we Altagamma tarapyndan taýýarlanan Spring 2025 Luxury Goods Worldwide Market gözlegine salgylanyp, WWD habar berýär.
Lýuks segmentinde satuw möçberi 2023-nji ýyldaky rekord 369 mlrd ýewrodan 2024-nji ýylda 364 mlrd ýewro çenli azaldy – pese gaçyş häzirki walýuta hümmeti boýunça, takmynan, 1% boldy. 2025-nji ýylyň birinji çärýeginde bazar 1-3% pese gaçmagyny dowam etdirdi.
Pese gaçyşyň sebäbi söwda dawalary, geosyýasy durnuksyzlyk we maliýe bazarlarynyň durnuksyzlygy boldy. Pudaga gatnaşyjylar üpjünçilik we logistika bilen bagly meseleler, ösüş üçin pul ýetmezçiligi bilen ýüzbe-ýüz bolýar. Brendleriň döredijilik işjeňligi hem gowşady.
Muňa garamazdan, Bain analitikleriniň pikiriçe, pudak, umuman, durnuklylygy saklaýar. Adamlar häzirem kaşaň harytlary satyn almak isleýär, çünki olar stiliň we üstünligiň nyşany bolup, brend bilen emosional baglanyşygy döredýär.
Hünärmenler 2025-nji ýylda 2-5% pese gaçyşyň bolmagyna garaşýar. Şeýle-de, ±2% derejesinde üýtgemeler bolup biler. 5-9% derejesinde güýçli pese gaçyşyň bolmak ähtimallygy pes hasaplanýar.
Oňyn dinamikany “ekspiriens-lýuks” segmenti – gymmat syýahatçylyk, kruizler, hususy awiasiýa, gämiler we ýokary gastronomiýa görkezýär. Ultra-kaşaň awtomobiller hem durnukly bolmagynda galýar, ýöne premium-klas kynçylyklary başdan geçirýär.
