Star Union kompaniýasy adaty dişleriň deregine magnit ulgamy ornaşdyrylan Magnetic Gear Motor (MGM) atly welosiped hereketlendirijisini hödürledi. Bu tehnologiýa güýji fiziki aragatnaşyk bolmazdan geçirýär diýip, «New Atlas» ýazýar.
Ölçegi 12×10×9 sm, agramy bolsa 2,3 kg bolan bu hereketlendiriji 80 Nm çenli iň ýokary torky we 250 Wt (iň ýokary 580 Wt-a çenli) güýji üpjün edýär. Bu görkezijiler MGM-ni elektrikli welosipedler üçin iň täsirli çözgütleriň birine öwürýär.
Sürtülmäniň ýokdugy sebäpli detallar çalt könelmeýär we sürülýän wagty sesi peseldýär. Magnit muftasy aşa ýüklenmelerde rahatlyk bilen süýşýär, bu bolsa hereketlendirijini zeperlerden goraýar. Mehaniki reduktorlardan tapawutlylykda, MGM yzygiderli hyzmat talap etmeýär.
Synaglar bu hereketlendirijiniň deňeşdirilen enjamlardan kiçidigine garamazdan, has uzak ýol geçmäge mümkinçilik berýändigini görkezdi.
Star Union kompaniýasy sygymy 160-dan 480 Wt-sagada çenli bolan ýol we dag welosipedleri üçin toplumlaryň hataryny işläp taýýarlady.
OEM öndürijiler üçin toplumlaryň ibermelerine 2025-nji ýylyň dördünji çärýeginde başlamak meýilleşdirilýär.
