Generatiw emeli aň hyzmatlarynyň platformasy bolan Adobe Firefly indi Android we iOS smartfonlarynda elýeterli boldy. Täze ykjam goşundy tekst beýany boýunça surat we wideo döretmäge, şeýle-de suraty redaktirlemek üçin EA gurallaryny ulanmaga mümkinçilik berýär diýip, The Verge ýazýar.
Firefly programmasy tekstden surat we wideo döretmek üçin Adobe-yň öz tehnologiýalaryny hem-de öň Photoshop-da elýeterli bolan Generative Fill we Generative Expand funksiýalaryny öz içine alýar. Mundan başga-da, ulanyjylar beýleki kompaniýalaryň EA modellerini ulanyp bilýär: surat döretmek üçin Google-dan Imagen 3 we Imagen 4, wideo üçin – Veo 2 we Veo 3, OpenAi-den hem surat dörediji.
Programmada döredilen kontent Creative Cloud-da awtomatik saklanyp galýar. Bu hem mundan beýläkki redaktirleme işlerini aňsatlaşdyrýar. Web-wersiýada bolşy ýaly, käbir EA funksiýalary bilen işlemek üçin Firefly kreditleri gerek. Olary aýlyk täzelenmeleriň çäginde ýa-da Creative Cloud-a tölegi ýazylyşykda alyp bolar.
Ykjam goşundydan başga-da, kompaniýa Firefly Boards platformasynyň beta-wersiýasynda wideo döretmek funksiýasyny giňeltdi. Indi ulanyjylar ýüklenen wideolary birleşdirip, Firefly-yň we üçünji tarap modelleriň kömegi bilen täze kadrlary döredip biler.
Ýakyn wagtda kompaniýa Firefly-yň mümkinçiliklerini giňeltmek üçin beýleki kompaniýalardan ýene täze EA gurallaryny goşmagy meýilleşdirýär.
