12-nji iýunda Hindistanyň günbataryndaky Gujarat ştatynda Air India awiakompaniýasynyň Boeing 787-8 Dreamliner ýolagçy uçary heläkçilige uçrady. Ol Ahmadabat şäherinden Londona gatnaw edýärdi.
Heläkçilik uçar howa menzilinden uçandan gysga wagtdan soň bolup geçdi. Ol ýaşaýyş sebitine, lukmanlar üçin umumy ýaşaýyş jaýynyň binasyna gaçdy.
Bortda 242 adam – 230 ýolagçy, iki uçarman we 10 ekipaž agzasy bardy. ANI agentligi Ahmadabadyň polisiýa gullugynyň başlygyna salgylanyp, azyndan bir ýolagçynyň diri galandygyny habar berdi. Ol hassahana ýerleşdirildi.
Boeing 787 Dreamline uçar modeli iň ygtybarlylaryň hataryna girýär. Bu model ilkinji gezek 2009-njy ýylda asmana galdy, 2011-nji ýylda bolsa täjirçilik ulanylyşyna başlady. 15 ýylyň dowamynda Dreamliner bilen bagly awiaheläkçilik hasaba alynmandy – Ahmadabatdaky heläkçilik ilkinji çynlakaý waka boldy diýip, KHBS belleýär.
Uçar Boeing amerikan awiaöndürijisiniň flagman uçary hasaplanýar. Ol ýangyjy az sarp etmegi, sessiz salony bilen tapawutlanýar we 13 500 km-den gowrak aralygy geçmäge ukyplydyr. Onuň gurluşynda ýeňil we berk materiallar ulanyldy.
Şol bir wagtyň özünde, 2013-nji ýylda dünýäde Dreamliner uçarlarynyň (49 uçar) ulanylyşy ýapon awiakompaniýalarynyň uçarlarynda litiý-ion akkumulýatorlarynyň ýanmagy bilen bagly iki hadysadan soň wagtlaýyn togtadyldy. Şol wagt ABŞ-nyň Federal raýat awiasiýasy edarasy (FAA) barlag geçirilýänçä bu uçarlaryň uçmagyny wagtlaýyn gadagan etdi.
Boeing kompaniýasynyň paýnamalary heläkçilikden soň ABŞ-daky deslapky söwdada tas 8% pese gaçdy diýip, Reuters ýazýar.
