Chanel fransuz moda öýi galyndylar bilen işlemek, gerekmejek materiallary peýdaly ulanmak we gaýtadan işlenilýän materiallary döretmek boýunça täze bölümçäniň işe girizilendigini habar berdi. Ol Nevold (Never Old sözlerinden gysgaltma) adyny aldy.
Brend bu ugra 2019-njy ýylda maýa goýup başlady. Indi bolsa Chanel diňe bir özi üçin galyndylary gaýtadan işlemän, eýsem beýleki kompaniýalara hyzmatlary (B2B hyzmaty) hödürlejek, şeýle-de tutuş moda pudagy üçin çözgütleri işläp taýýarlajak (R&D merkezi) doly derejeli bölümçäni döretdi.
Nevold-a LVMH-iň öňki menejeri Sofi Brokar ýolbaşçylyk eder. Ol operasion modeli guramak we taslamany ösdürmek bilen meşgullanar.
Nevold eýýäm soňky ýyllarda Chanel tarapyndan döredilen ýa-da satyn alnan üç kompaniýany birleşdirýär:
- ·L'Atelier des Matières — brendler bilen matalary we egin-eşikleri gaýtadan işleýjileriň arasynda araçy;
- ·Filatures du Parc — ýüplügi gaýtadan işlemek boýunça 50 ýyllyk tejribesi bolan fransuz fabrikasy;
- ·Authentic Material — derini gaýtadan işleýän we täze materiallary döredýän firma.
“Chanel-i Chanel gaýtadan işlemeýär. Biz hem özümizden, hem öz galyndylaryny satmaga taýýar beýleki kompaniýalardan galyndylary alýarys” – diýip, Chanel-iň moda ugrunyň prezidenti Bruno Pawlowski belledi.
Ozal galyndylary gaýtadan işlemek ugruna LVMH we Kering kompaniýalary hem maýa goýdy. Ýöne tankytçylar umumy önümçilik möçberini azaltmazdan, hatda iň gowy gaýtadan işlemek ulgamlarynyň hem meseläni çözmejekdigini belleýär.
