15-nji iýundan 13-nji iýul aralygynda ABŞ-da 2025-nji ýylyň futbol boýunça Klublaýyn dünýä çempionaty geçiriler. Taryhda ilkinji gezek ýaryş alty kontinental konfederasiýadan 32 toparyň gatnaşmagynda giňeldilen görnüşde geçer.
Halkara Futbol Federasiýasy (FIFA) umumy gaznasy 1 mlrd dollar bolan pul baýragynyň paýlanyşyny tassyklady. 525 mln dollar klublaryň arasynda gatnaşygy üçin paýlanar, galan 475 mln dollar sport netijelerine görä berler. Çempionatyň ýeňijisi 125 mln dollara çenli gazanyp biler.
Toparlar her biri dört klubdan ybarat sekiz toparça bölündi. 1/8 finala her toparçadan iň gowy iki topar çykar. Pleý-off oýunlary bir oýundan ybarat bolar.
Ýaryşda ilkinji gezek Halkara Futbol Assosiasiýalarynyň Geňeşiniň (IFAB) täze düzgüni ulanylar: eger derwezeban topy elinde sekiz sekuntdan köp saklasa, emin garşydaşyň peýdasyna burç urgusyny bellär.
Şeýle-de, eminler oýnuň gidişini ýazga alýan kameralary dakynar.
Ýaryşa Ýewropadan soňky dört möwsümiň Çempionlar ligasynyň dört ýeňijisi we UEFA reýtingi boýunça sekiz topar gatnaşar. Günorta we Demirgazyk Amerikadan, Aziýadan, Afrikadan we Okeaniýadan soňky ýyllaryň esasy kontinental ýaryşlarynyň ýeňijileri gatnaşar.
Konfederasiýalar boýunça ýaryşa gatnaşyjylaryň doly sanawy:
- UEFA (12): Çelsi, Mançester Siti, Real Madrid, Bawariýa, PSŽ, Inter Milan, Portu, Benfika, Borussiýa Dortmund, Ýuwentus, Atletiko Madrid, Zalsburg
- KONMEBOL (6): Palmeýras, Flamengo, Fluminense, Botafogo, Riwer Pleýt, Boka Huniors
- KONKAKAF (5): Monterreý, Sietl Saunders, Paçuka, Los-Anjeles (“Amerika” garşy pleý-ini geçen), Inter Maýami (ýaryşyň ýer eýesi hökmünde)
- AFK (4): Al-Hilýal, Urawa Red Daýmonds, Al-Aýn, Ulsan Hýonde
- KAF (4): Al-Ahli, Widad, Esperans, Mamelodi Sandaunz
- OFK (1): Oklend Siti
Belläp geçsek, reýting boýunça çempionata her ýurtdan diňe iki topar gatnaşyp bilýär, şol sebäpli “Liwerpul” we “Barselona” sanawda ýok.
Açylyş oýny 15-nji iýunda 05:00-da (Aşgabat wagty) geçiriler – “Al-Ahli” (Müsür) Lionel Messiniň çykyş edýän “Inter Maýami” topary (ABŞ) bilen duşuşar.
Ýaryşyň tertibi:
- Toparlaýyn tapgyr: 14-26-njy iýun
- 1/8 final: 28-nji iýun – 1-nji iýul
- Dörtden bir final: 4-5-nji iýul
- Ýarym final: 8-9-njy iýul
- Final: 13-nji iýul (Metlaýf-stedium, Nýu-Jersi)
