“Mançester Sitiniň” baş tälimçisi Hosep Gwardiola Mançester uniwersitetiniň hormatly doktorlyk derejesini aldy. Ol şäheriň ösüşine goşan goşandy we futboldan daşary işleri, şol sanda Guardiola Sala Foundation haýyr-sahawat gaznasynyň işi üçin sylaglandy.
Diplom gowşurylanda uniwersitetiň wekilleri Gwardiolanyň ýerli jemgyýete ýetiren täsirini belledi. Tälimçiniň özi klubda işlän dokuz ýylynda Mançesteriň özi üçin öýe öwrülendigini belläp geçdi.
“Men Mançester uniwersitetiniň şäherimiz üçin näderejede möhümdigini bilýärin. Ol köp ylmy gözlegleriň merkezi bolup, açyşlaryň baý taryhyna eýedir. Dogrusyny aýtsam, şeýle abraýly edaradan şeýle hormata mynasyp bolmak – bu ajaýyp duýgy. Men Mançester uniwersitetinde hemmelere bu pursat üçin minnetdarlyk bildirmek isleýärin, şeýle-de men dowamly goldawlary üçin “Mançester Sitide” hemmelere minnetdarlyk bildirýärin” – diýip, tälimçi aýtdy.
Hosep Gwardiola 2016-njy ýyldan bäri “Mançester Sitä” ýolbaşçylyk edýär. Bu döwürde ol klub bilen 17 kubok, şol sanda Çempionlar ligasyny utdy. Ispaniýaly hünärmen tarapyndan esaslandyrylan Guardiola Sala Foundation gaznasy saglygy goraýyş, bilim pudaklarynda we pes girdejili maşgalalara kömek etmekde işjeň ýardam berýär.
Mançester uniwersiteti Beýik Britaniýanyň öňdebaryjy ýokary okuw mekdepleriniň biri bolup, 1824-nji ýylda esaslandyryldy.
