Mercedes-Benz özüniň flagman S-Class sedanynyň ýörite görnüşlerini çykarmagyny dowam etdirýär. Bu gezek kompaniýa 2021-nji ýylda aradan çykýança «Maybach» taslamasyna gatnaşan meşhur dizaýner Wirjil Ablowuň hormatyna ýörite model çykardy. Onuň hatyrasyna «Mercedes-Maybach S 680 Virgil Abloh RS Edition» atly awtoulag döredildi.
Bu seriýa diňe 150 nusga bilen çäklenýär, şolaryň 39-sy ABŞ bazary üçin niýetlenendir. Awtoulagyň daşky görnüşinde iki reňkden peýdalanyldy: Ablowuň stilini we mirasyny alamatlandyrýan gara Obsidian we çägesöw öwüşginler. Hrom we gara elementler modeliň eksklýuziwligini nygtaýar.
Tehniki aýratynlyklary öňküligine galdy. Kapotynyň aşagynda 603 at güýjüni öndürýän we 664 Nm torky üpjün edýän 6,0 litrlik goşa turbinaly V12 hereketlendiriji bar. Awtoulag 0-dan 100 km/sag tizlige bary-ýogy 4,5 sekuntda ýetýär.
Daşky görnüşi 22 dýuýmlyk poroşok boýag bilen örtülen diskleri, 20 mm peseldilen asma ulgamy we «Maybach» nyşanynyň LED yşyklandyrmasy bilen tapawutlanýar.
