Britaniýaly bir adam öz doganynyň göwreli aýalyny halaýan tagamy – Beýik Britaniýada meşhur bolan büzmeçli hamyr bilen begendirmek üçin uçarda 1600 km ýol geçdi. Bu barada Mirror neşiri habar berýär.
Är-aýal Loren we Jeými Niland Portugaliýada dynç alyşdady. Loren göwreliligiň ýedinji aýynda bolup, stresi başdan geçirýärdi. Onuň aýtmagyna görä, onuň şähdini açyp biljek ýeke-täk zat – Greggs tiz tagam ulgamyndan büzmeçli hamyrdy.
Muny eşiden Jeýminiň dogany Greg büzmeçli hamyry satyn alyp, Portugaliýa uçdy. Ol gelne tutuş dynç alşyna ýeter ýaly dört gap büzmeçli hamyr getirdi.
“Meniň doganym büzmeç getirmek üçin, bütin gün Portugaliýa gelmäge sarp etdi we indi 24 sagatdan yzyna gidýär. Minnetdar, doganym. Ýoluň ak bolsun” – diýip, Jeými sosial ulgamlarda ýazdy.
Soňrak Jeými geljekki çagasy üçin at saýlamaga kömek etmek haýyşy bilen ulanyjylara ýüzlendi. Teklipleriň arasynda Arabella (gyz dogulsa) we Roman (oglan dogulsa) bar. Ulanyjylaryň biri çagany Greg diýip atlandyrmagy teklip etdi.
Greggs – Beýik Britaniýada 1951-nji ýylda esaslandyrylan iň uly tiz tagam ulgamlarynyň biri. Onda büzmeçli hamyr, sendwiç we içgiler satylýar. Ýakynda Londondaky Hanym Týusso muzeýinde Greggs-iň büzmeçli hamyrynyň heýkeli hödürlendi. Ol 5-nji iýunda bellenilýän büzmeçli hamyryň Milli güni mynasybetli gips guýmak usuly bilen elde ýasaldy.
