Samsung eplenýän smartfonlaryň hatarynda Galaxy Z Fold 7 Ultra adyny alyp biljek “kitapça” görnüşli täze modeliň peýda bolup biljekdigine yşarat etdi. Ozal bu hatarda kompaniýa diňe adaty wersiýalary çykarypdy.
Anonsda hödürlenen surata görä, gurluş aýratyn inçe korpusy bilen tapawutlanar.
Samsung modeliň adyny göni aýtmaýar, ýöne ençeme ýyl ulanyjylaryň has uly ekranlara, kämilleşdirilen kameralara we aragatnaşygyň hem döredijiligiň täze usullaryna bolan islegine diň salandygyny aýdýar. Kompaniýa muny “Ultra-tejribe” diýip atlandyrýar – bu diňe bir giňeldilen mümkinçilikler däl-de, eýsem has ykjam we amatly bolmakdyr.
Şeýle-de, Samsung EA agenti barada agzap geçýär. Ol laýyk restorany saýlap, onda ýer bronlap biler we söhbetdeşlere habarnama ýollap biler. Kompaniýanyň aýtmagyna görä, EA gurallary gündelik işleri ýönekeýleşdirýär: habarlar bilen alyşmaga, web-sahypalary görmäge we tehniki nýuanslara ünsüňi sowmazdan oýun oýnamaga kömek edýär.
Samsung EA funksiýalaryny hut eplenýän format üçin optimizirländigini nygtaýar. Açylan ýagdaýynda gurluş oýun we birbada birnäçe iş üçin gerekli enjama öwrülýär.
Ultra indeksli model ilkinji gezek 2020-nji ýylda Galaxy S20 hatarynda peýda boldy. 2022-nji ýylda Galaxy S22 Ultra modeli S Pen stilusyny aldy we 2020-nji ýylda soňky modeli çykan Galaxy Note hatarynyň yzyny dowam etdiriji boldy.
