Ultra-inçe Galaxy S25 Edge tehnobloger Zak Nelsonyň (JerryRigEverything) çydamlylyk synagyndan üstünlikli geçdi. Korpusynyň ýogynlygynyň bary-ýogy 5,8 mm we agramynyň 163 g bolmagyna garamazdan, smartfon berk bolup çykdy.
Synag wagtynda smartfon öň we yzky panellere agram salyp, egreltmek synanyşygynda formasyny üýtgetmedi we döwülmedi. Korpus sypjyryklara-da çydamly boldy: Gorilla Glass Ceramic 2 aýnasy bilen goralan frontal panelde çyzyk yzlary diňe Moos şkalasy boýunça gatylygy 6 bolan guralyň täsiri bilen peýda bolup başlady. Has çuň çyzyk yzlary bolsa 7-nji derejede peýda boldy.
Yzky panel Gorilla Glass Victus 2 aýnasy bilen örtülen, korpus bolsa titandan ýasalan bolup, bu gurluşyň berkligini ýokarlandyrýar.
Ýokary temperatura çydamlylyk synagynda ekran görünýän zeper bolmazdan 30 sekuntlap oduň täsirine çydady. Käbir beýleki gurluşlar şeýle synagdan ejiz gelýär.
Zak Nelson korpusynyň inçeligi sebäpli smartfonyň döwülmegine garaşandygyny, ýöne onuň berkligine haýran galandygyny aýtdy. Deňeşdirmek üçin, soňky iPad Pro şeýle egreltmä çydamandy.
Galaxy S25 Edge 30-njy maýda satuwa çykdy. Ol täzelenme ýygylygy 120 Gs çenli we iň ýokary ýagtylygy 2600 kd/m² bolan 6,7 dýuýmlyk Dynamic AMOLED 2X ekrany, Snapdragon 8 Elite prosessory, 12 GB operatiw ýat we iki esasy kamera – 200 we 12 Mp bilen enjamlaşdyryldy. Smartfon IP68 ülňüsi boýunça suwdan we tozandan goragly. Ol üç reňkde elýeterli: Titanium Icy Blue, Titanium Silver и Titanium Jet Black.
