Sony kompaniýasy özbaşdak smartfon önümçiliginden gutarnykly ýüz öwrüp, bu işi beýleki kompaniýalara tabşyrdy. Ozal ol arzan we orta modelleri autsorsinge beripdi, indi bolsa gymmat flagmanlar, mysal üçin, Sony Xperia I VII hem Sony-nyň zawodlarynda ýygnalmaz. Ýöne, çeşmeleriň maglumatlaryna görä, bu çözgütden smartfonlaryň hili zyýan çekmedi.
Şeýlelikde, tutuş önümçilik tapgyryna doly gözegçilik edýän dünýäde ýeke-täk smartfon brendi Günorta Koreýanyň Samsung-y bolup galdy. Kompaniýa gurluşlaryň diňe bir ideýasyny, dizaýnyny we beýlekileri işläp taýýarlaman, eýsem olary öz güýji bilen çykarýar.
Apple we Google ýaly beýleki uly brendler diňe işläp taýýarlamak bilen meşgullanýar. Önümçiligi welin hyzmatdaşlara ynanýar, bu hem çykdajylary azaltmaga mümkinçilik berýär. Autsorsing, zawodlary saklamaga ýa-da logistika meselelerini çözmäge zerurlygyň ýokdugy üçin, goşmaça çykdajylary azaldýar. Mundan başga-da, bu çemeleşme isleg ýokarlanan ýagdaýynda önümçilik möçberini tiz artdyrmaga mümkinçilik berýär.
Resmi däl maglumatlara görä, Sony önümçilik prosesinden doly çykmak kararyna geldi. Onuň gurluşlarynyň ýokary bahalary satuw gerimini çäklendirýär. Autsorsing kompaniýa bazar ýagdaýyna uýgunlaşyp, çykdajylary azaltmaga mümkinçilik berer.
Samsung, bäsdeşlerinden tapawutlylykda, öz önümçilik kuwwatyna maýa goýmagy dowam etdirýär. Şeýle çemeleşmeden ýüz öwürmek kompniýa üçin häzirlikçe maksadalaýyk däl: tutuş önümçilik tapgyryny gözegçilikde saklamagy oňa Android smartfonlary öndürijileriň arasynda strategiki artykmaçlygy berýär.
