Rotterdam şäheriniň (Niderlandlar) iň gadymy port desgalarynyň birinde Ýewropada iň uly ýüzýän ýaşaýyş sebiti Spoorweghaven peýda bolar. Taslama Daniýanyň MAST binagärlik studiýasy we BIK bouw gurluşyk kompaniýasy tarapyndan işlenip taýýarlandy.
Şäherçe suwda ýerleşer we onda 100 töweregi ýaşaýyş öýi, jemgyýetçilik ýerleri, baglyklar we eýwanlar bolar.
Taslamanyň awtorlarynyň habar bermegine görä, köp gatly agaçdan gurlan jaýlar ýüzýän platformalarda oturdylar. Desgalar ilki gurlar, soňra tirkege alyp, gämi duralgasyndaky ýere eltiler we ygtybarly berkidiler. Zerur bolan ýagdaýynda, mysal üçin, ýeriň kärende möhleti gutarandan soň, tutuş toplumy başga bir ýere geçirmek bolar.
Täze sebit şäher bilen welosiped ýodalary we köprüler arkaly birleşdiriler. Sebitiň çäginden bolsa suw ýoly geçiriler. Ol şäheriň beýleki sebitleri bilen transport gatnaşygyny üpjün eder.
Taslama irki tapgyrda bolsa-da, eýýäm binalaryň Gün panelleri bilen enjamlaşdyryljakdygy mälim, bu şäheriň elektrik ulgamyna düşýän agramy azaldar. Şeýle-de, suwy süzmek üçin gamyş jeňňelligini döretmek meýilleşdirilýär. Munuň bilen Biomatrix kompaniýasy – inžener-ekologlaryň şotlandiýaly topary meşgullanýar.
Ýüzýän şäherçe gurluşyk üçin ýerleriň ýetmezçiligine jogap bolar. Şeýle çözgütler Demirgazyk Ýewropanyň beýleki şäherlerinde, mysal üçin, Kopengagende eýýäm durmuşa geçirilýär.
