Environmental Photography Award 2025 bäsleşiginiň (“Daşky gurşawyň fotosuraty baýragy 2025”) guramaçylary ýeňijileri we finalçylary yglan etdi.
Baýrak ekologiýa, tebigaty goramak we ýitip barýan görnüşleri goramak meselelerine ünsi çekmek üçin Monakonyň knýazy Alber II-niň gaznasy tarapyndan döredildi. Şu ýyl emin agzalarynyň başlygy National Geographic-iň meşhur fotosuratçysy Ami Witale boldy.
Bäsleşigiň ýeňijisi ispaniýaly fotosuratçy we deňiz biology Anhel Fitor boldy. Onuň “Göze görünmeýän şöhratsyz gahrymanlar” suratynda Ispaniýanyň kenaryndaky deňiz gurçuklarynyň öz hinlerinden çäge “çüwdürimlerini” goýberýän pursaty şekillendirilýär. Bellenilişi ýaly, hut köp ösüntgili gurçuklar deňiz düýbüniň ýokarky gatlaklarynda kislorod deňagramlylygyny saklamakda möhüm rol oýnaýar. Olaryň göze görünmeýän işi tutuş suwasty ekoulgamyň sagdynlygyny üpjün edýär.
“Suratda – göze görünmeýän, ýöne örän möhüm deňiz ýaşaýjylarynyň gündelik durmuşy görkezilýär, Ortaýer deňziniň tutuş ekoulgamy, diýmek – biz hem olara baglydyrys” – diýip, awtor düşündirýär.
Surat “Suwasty dünýäler” kategoriýasynda hem iň gowusy diýlip ykrar edildi.
Onuň “Türgenleşik güni” atly işi hem “Özgertme döredijiler” kategoriýasynda tapawutlandy – bu Ispaniýadaky haýwanlaryň dikeldiş merkezinde kauanka pyşdylynyň çagasyny iýmitlendirmegiň tolgundyryjy suratydyr.
Fitor – fotosurat dünýäsinde iň abraýly şahsyýetleriň biri. Ol eýýäm World Press Photo, Wildlife Photographer of the Year, American Photography we Sony World Photography baýraklaryna mynasyp boldy.
Kategoriýalar boýunça finala çykan beýleki suratlar:
Tomaşaçylaryň baýragy:
“Otdan soň – umyt” (Braziliýanyň Pantanal zolagynda bolan ýangyndan soň diri galan tapiriň suraty. Walente atly bir ýaşly tapir dört aýagynyň we gulagynyň ýanygyny aldy) / Fernando Façiole (Braziliýa)
“Polýar täsinlikleri” kategoriýasy:
Galapagos adalarynda dynç alyşdaky deňiz iguanasy / Hawýer Asnar (Ispaniýa)
“Meduza we aýsberg” (surat Grenlandiýanyň kenarlarynda düşürildi) / Galis Uaro (Fransiýa)
Alýaskadaky ak kelleli bürgüt / Ueýn Klýuwer (ABŞ)
“Adamzat tebigata garşy” kategoriýasy:
“Durmuş fabrikasy” (suratda köp wagtlap Tailanddaky gaplaň fermasynda satuw üçin göwresinde nesil göterip, bendilikde bolan garry ene gaplaň. Ony ekoaktiwistler halas etdi) / Emi Jons (Beýik Britaniýa)
Zibil deňzinden geçip barýan pil / Lakşita Karunaratna (Şri-Lanka)
“Özgertme döredijiler” kategoriýasy:
“Türgenleşik güni” / Anhel Fitor, Ispaniýa
ABŞ-nyň kenarynda lamantin çagasy bilen / Jeýson Galli (ABŞ)
Ägirt garynja iýiji Braziliýada bejergi alýar / Fernando Façiole (Braziliýa)
“Tokaýyň ýüreginde” kategoriýasy:
“Şalaryň çaknyşygy” (sugun tomzaklaryň göreşi) / Ýakopo Nerossi (Italiýa)
