Britaniýaly strit-art (köçe sungaty) suratkeşi Benksi täze işini hödürledi.
Instagramda ýerleşdirilen suratda goňras diwaryň ýüzüne trafaret bilen çekilen maýak görünýär. Onuň üstünde bolsa: «Men siziň mende görýän zadyňyz bolasym gelýär» diýlip ýazylan. Şeýle hem ýanaşyk duran sütüne tarap emeli kölege şekillendirilipdir.
Suratkeş postuň aşagyna hiç hili gol goýmady we eseriň nirede ýerleşýändigini hem aýtmady. «BBC-niň» maglumatlaryna görä, ulanyjylar graffitiniň Fransiýada, ähtimal, Marsel şäheriniň Le-Panýe kwartalynda ýerleşýändigini çaklaýarlar.
Benksi sosial we syýasy temalardaky strit-artlary bilen tanalýar. Suratkeşiň kimdigi belli däl. Ol anonim ýagdaýda işleýär.
Ady rowaýata öwrülen suratkeşiň işleri auksionlarda millionlarça dollara satylýar. Suratkeşiň iň gymmat eseri «Söýgi zibil gutusynda» («Love is in the Bin») atly işi bolup, ol 25,4 million dollara satylypdy.
