1bitrainbow taslamasyna gatnaşyjylar ilkinji Apple Macintosh kompýuteriniň 5,5 esse kiçeldilen nusgasyny hödürledi. Ol Pico-mac-nano diýip atlandyrylýar we bu mini PK-nyň boýy bary-ýogy 62 mm bolup, eliň aýasyna sygýar.
Kompýuteri taýýar görnüşde satyn almak ýa-da özbaşdak ýygnamak bolýar – onuň üçin gerekli esbaplar aýratyn satylýar.
Pico-mac-nano kompýuteri Raspberry Pi Pico mikrokontrolleriniň esasynda işleýär. Onda 480x342 piksel durulykda 2 dýuýmlyk displeý oturdyldy. Korpus 3D printerde çap edildi. Öňdäki panelde LCD ekrany üçin slot, içinde bolsa asyl modeldäki ýaly komponentleri dogry we berk oturtmak üçin ýörite berkidijiler ýerleşdirildi.
Energiýa üçin yzky paneldäki USB-C porty ulanylýar. Onuň üsti bilen daşarky klawiaturany we syçanjygy birikdirip bolýar. Şeýle-de, gurluş microSD kartyny goldaýar we elektrik ulgamyndan ýa-da batareýadan işläp bilýär.
Satuwda hudožnik Pablo Pikassonyň stilinde ýerine ýetirilen gutuda kolleksiýa görnüşi hem hödürlenýär. Ol hakyky Macintosh 128K ýalydyr.
Işläp düzüji Nik Gillard Pico-mac-nano-nyň doly derejeli kompýuter däl-de, has dogrusy, konsept-art hökmünde döredilendigini belledi. Onuň aýtmagyna görä, bu açyk kodly taslama bolup, onuň maksady RP Pico-nyň Macintosh-yň köne programmalaryny işledip biljekdigini barlamakdan ybarat. Ýöne ol çibiň ähli köne programmalary işletjekdigini kepillendirmeýär.
Taýýar toplumyň bahasy £56. Kolleksiýa görnüşi – £78. Ýygnamak üçin ähli shemalar we faýllar GitHub-da mugt elýeterlidir.
