2025-nji ýylyň başynda Nýu-Ýorkda awtomobil sürüjileri üçin girizilen töleg şäher gaznasyna 4 aýda 217 mln dollar getirdi. Bu barada Nýu-Ýorkda şäher transport ulgamyna jogap berýän şäheriň ulag edarasyna (Metropolitan Transportation Authority, MTA) salgylanyp, Bloomberg habar berýär. Töleg ýol hereketiniň işjeň wagty käbir merkezi köçelere giriş üçin alynýar.
Mysal üçin, indi Manhettendäki 60-njy köçeden günorta geçmek üçin sürüjiler sagatda 9 dollar töleýär.
Operatoryň hasaplamalaryna görä, ýylyň ahyryna çenli täze nyrh 500 mln dollara çenli girdeji getirip biler. Ýygnalan pullar şäherde jemgyýetçilik transportyny, şol sanda meşhur Nýu-Ýork metropolitenini döwrebaplaşdyrmaga gönükdirilmeli. Şeýle-de, MTA-nyň nyrh programmasy dyknyşyklara garşy göreşmegi we Nýu-Ýorkuň merkezinde howanyň hilini gowulaşdyrmagy maksat edinýär. Häzire çenli ABŞ-nyň megapolislerinde şeýle transport tölegi bolmandy diýip, Bloomberg belleýär.
MTA-nyň maglumatlaryna görä, täze düzgün, hakykatdanam, şäheriň köçelerindäki hereketi azaltdy. 5-nji ýanwarda girizilenden bäri aprel aýyna çenli Manhetten sebitine geçen ýylyň degişli döwri bilen deňeşdirilende, takmynan, 8 mln awtomobil az girdi.
Şeýle-de bolsa, MTA-nyň çözgüdi ABŞ-nyň ulag ministri Şon Daffiniň göwnünden turmady. Ol täze nyrhyň kiçi biznese we işçi toparyna gatnaşykda adalatly däldigini aýtdy. Döwlet işgäri dyknyşyklar üçin töleg aýrylmadyk ýagdaýynda Nýu-Ýorkuň administrasiýasynyň ýol-ulag taslamalaryny maliýeleşdirmegiň togtadyljakdygyny aýdyp, goldaw üçin kazyýete ýüz tutdy.
ABŞ-nyň okrug kazysy Lýuis Liman 9-njy iýunda geçiriljek kazyýetiň indiki mejlisine çenli federal hökümetine haýsydyr bir hereketi etmegi gadagan etdi.
