Donald Trampyň administrasiýasy F, M we J kategoriýaly talyp wizalaryny almak üçin dalaşgärler bilen söhbetdeşlik geçirmegi wagtlaýyn togtatmagy tabşyrdy. Bu barada döwlet sekretary Marko Rubio tarapyndan gol çekilen içerki resminama salgylanyp, Politico neşiri habar berýär.
Söhbetdeşlik täze görkezmeler alynýança meýilleşdirilmez. Eýýäm meýilleşdirilen interwýular ýatyrmaga degişli däldir.
Bu çäre administrasiýanyň arza berýänleri barlamagyň tertibini üýtgetmek meýilnamalary bilen baglanyşykly. Hususan-da, olaryň sosial ulgamlardaky akkauntlaryny öwrenmek hökmany hasaplanýar.
Sosial ulgamlardaky sahypalary seljermegiň ölçegleri mälim edilmeýär. Resminamada terrorizme we antisemitizme garşy göreşe gönükdirilen permanlar agzalýar.
The Wall Street Journal-yň belleýşi ýaly, mejbury togtatma arzalaryň iň köp tabşyrylýan döwrüne gabat geldi we wizalary resminamalaşdyrmagy düýpli haýalladyp biler. Bu daşary ýurtly talyplaryň amerikan ýokary okuw mekdeplerine girmegini kynlaşdyrýar. Aýratynam, býujeti daşary ýurtly talyplaryň hasabyna garaşly bolan uniwersitetler uly zyýan çeker.
Bu çözgüt tankyda getirdi. Oňa garşy halkara bilim pudagynda hünärmenler assosiasiýasy NAFSA garşy çykdy. “Daşary ýurtly talyplaryň howp abandyryp biljekdigi baradaky pikir manysyz. Olar – Birleşen Ştatlaryň aktiwi. Şeýle barlaglar üçin maliýe we wagt çykdajylary hem uly mesele döredýär” – diýip, guramanyň baş direktory Fanta Au belledi.
Talyp wizalaryny resminamalaşdyrmak işini togtatmak ädimi Ak tamyň akademiki jemgyýete edýän basyşynyň dowamy boldy. Ozal Tramp daşary ýurtlularyň Garwarda okuwa girmegini gadagan etmäge synanyşypdy, ýöne ABŞ-nyň okrug kazyýeti bu çözgüdi petikledi.
Statistika boýunça, ABŞ-da, takmynan, bir million daşary ýurt raýaty ýokary bilim alýar, olar ykdysadyýete her ýyl 44 mlrd getirýär.
