«Hermès» 15 müň dollara nauşnik hödürledi. Onuň dizaýny üçin brendiň meşhur önümlerinden, esasanam «Kelly» atly sumkasyndan ylham alnypdyr diýip, «WWD» ýazýar.
Model «Hermès-iň» döredijilik ussahanasy bolan «Ateliers Horizons» tarapyndan, dizaýner Aksel de Boforyň ýolbaşçylygynda işlenip düzülipdir. Ol mundan ozal hem brend üçin deri hiňňildikler we serfbordlar taýýarlapdy.
Nauşnikleriň korpusy elde boýalan göle derisinden ýasalypdyr. Bezeginde gymmat bahaly metallar we gaýtadan işlenilen agaç ulanylypdyr. Nauşnikler gara, goňur we gök reňklerde hödürlenýär.
Nauşnikleriň içinde döwrebap audiokomponentler ýerleşdirilen, olar arassa sesi we çuňňur baslary üpjün edýär. Şeýle-de bolsa, «Hermès» bu ýerde tehnologiki aýratynlyklaryň esasy maksada öwrülmändigini belleýär. Üns ilkinji nobatda ussatlyga we daşky gözelligiň sazlaşygyna berilýär.
Täze önümiň satuwy tomusda başlanar. Nauşniklerden başga-da, kompaniýa beýleki saz aksessuarlaryny hödürlär. Meselem, kub şekilli dinamikalar we gyzyl agaçdan ýasalan DJ stoly.
