Iň seýrek superkarlaryň biri – «Lamborghini Centenario Roadster» Germaniýada satuwa çykdy. Awtoulagyň başlangyç bahasy 5,2 million ýewro.
Deňeşdirmek üçin, gibrid hereketlendirijili we 1001 at güýji bolan täze «Lamborghini Revuelto-nyň» bahasy 600 müň dollardan başlaýar.
«Centenario-nyň» has gymmat bolmagynyň sebäbi – onuň eksklýuziwligi. Ondan bary-ýogy 40 sanysy öndürilen: 20 sany kupe we 20 sany rodster.
Bu model 2016-njy ýylda brendiň esaslandyryjysy Ferruçço Lamborgininiň 100 ýyllygynyň hormatyna tanyşdyrylypdy. Awtoulag «Aventadoryň» binýadynda gurlan. Ol 770 at güýji bolan atmosferaly V12 hereketlendiriji bilen enjamlaşdyrylan. 100 km/sag tizlige bary-ýogy 2,8 sekuntda ýetýär, iň ýokary tizligi bolsa 350 km/sag.
Satuwa çykarylan nusga gyzyl reňkde we gara aksentler bilen boýalan. Satyjynyň aýtmagyna görä, bu rodster asla sürülmedik diýen ýaly, diňe «eltip berlende» geçilen ýörişi bar. Interýeri gara-gyzyl öwüşginlerde dizaýn edilen, awtoulagyň ýagdaýy «ideal» diýlip häsiýetlendirilýär. Ulag 2018-nji ýylda hasaba alnypdyr we häzirki wagtda Germaniýada ýerleşýär.
Şol bir wagtda hünärmenler ulagy satyn almak isleýänlere seresap bolmagy we söwdany hukuk taýdan gowy öwrenmegi maslahat berýärler. Sebäbi, satyjynyň satuwda başga hiç hili awtoulagy ýok, bu hem, elbetde, käbir soraglary döredýär.
