Geçen gije Las-Wegasda American Music Awards baýragynyň 51-nji gowşurylyş dabarasy geçirildi. “Ýylyň artisti” Billi Aýliş boldy diýip, CBS News habar berýär.
Bu nominasiýada baýrak üçin Ariana Grande, Kendrik Lamar, Sabrina Karpenter, Teýlor Swift, Post Malone hem dalaş edipdi.
Billi Aýliş dalaşgär görkezilen ýedi nominasiýasynyň ählisinde, şol sanda “Ýylyň albomy” (Hit Me Hard and Soft), “Halanýan pop-ýerine ýetirijisi”, “Halanýan gastrol aýdymçysy”, “Halanýan pop-albomy” kategoriýalarynda ýeňiji boldy. Birds of a Feather aýdymy “Ýylyň aýdymy” we “Halanýan pop-aýdymy” nominasiýalarynda birinji boldy.
Repçi Eminem iň gowy hip-hop ýerine ýetirijisi hökmünde baýrak aldy. Zenanlaryň arasynda bu ugurda Megan Thee Stallion ýeňiş gazandy.
Kendrik Lamar dokuz nominasiýada dalaşgär görkezilendigine garamazdan, diňe birinde – Not Like Us aýdymy bilen “Iň gowy hip-hop aýdymy” kategoriýasynda ýeňmegi başardy.
“Ýylyň açyşy” kategoriýasynda baýragy režissýor Jeý Jeý Abramsyň gyzy Greýsi Abrams aldy.
Ledi Gaga we Bruno Mars Die With a Smile aýdymynyň klibi üçin sylaglandy hem-de “Iň gowy duet” kategoriýasynda ýeňiş gazandy. Bruno Mars iň gowy pop-ýerine ýetirijisi, Ledi Gaga elektron/tans aýdym-saz stilinde iň gowy ýerine ýetiriji diýlip ykrar edildi.
Beýonse we Post Malone kantri stilinde iň gowy ýerine ýetirijiler boldy. Şakira latyn amerikan aýdymy (Soltera) üçin baýrak aldy. R&B kategoriýasynda The Weeknd we SZA ýeňiji boldy.
Twenty One Pilots dueti rok-ýerine ýetirijileri we rok-albomy kategoriýalarynda iň gowusy boldy. Iň gowy rok-aýdymy Linkin Park toparynyň The Emptiness Machine aýdymy boldy.
