«Oasis» britan toparynyň gaýtadan birleşendigi baradaky habara begenen muşdaklar şu tomus Beýik Britaniýada geçiriljek 17 konserti görmek üçin 1,06 milliard funt sterling harçlamaga taýýar. «Barclays» maliýe konglomeraty tarapyndan geçirilen gözlegiň netijesine görä, bu konsertlere 1,4 million adam gatnaşar we her bir muşdak, ortaça, 766 funt sarp eder. Bu barada «The Guardian» neşiri habar berýär.
Bu mukdaryň, takmynan, 150 funty peteklere gider, emma «Ticketmaster» platformasynyň bahalandyryş ulgamy sebäpli, gaty az adam şol bahadan satyn alyp bildi. Köpüsi petekleri 370 funt sterlinge çenli has gymmat bahadan satyn almaly boldy. Alyjylaryň şikaýatlary sebäpli, britan gözegçilik edaralary bu ýagdaý boýunça eýýämden derňew geçirip başladylar.
Muşdaklaryň peteklerden daşary, konsertleriň geçiriljek şäherlerinde ýaşaýyş üçin ortaça 108 funt, ýol çykdajylary üçin 70 funt, iýmit we içgiler üçin 75 funtdan gowrak, şeýle-de aýratyn dabaraly pursat üçin ýörite stilde täze egin-eşik üçin 73 funt we ýadygärlik harytlary bilen merç üçin hem 60 funt diýen ýaly harçlamagyna garaşylýar.
Soragnama gatnaşan muşdaklaryň, takmynan, 30%-i 1990-njy ýyllaryň modasyna görä geýinjekdiklerini, 14%-i bolsa saçlaryny «Oasis» toparynyň agzalary bolan Gallaher doganlaryňka meňzedip aldyrjakdyklaryny aýtdylar. Käbir muşdaklar bolsa, 1990-njy ýyllaryň atmosferasyny has gowy duýmak üçin, konsert wagty telefonlaryny ulanmazlygy ýüregine düwüpdir.
