Toyota kompaniýasy we onuň Lexus premium-brendi elektromobil hatarynyň uly täzelenmesi barada habar berdi. Kompaniýalar 2026-njy ýyla çenli täze sedanlary, krossowerleri we flagman konseptleri hödürlär. Jemi 10-a çenli täze modeli çykarmak meýilleşdirilýär.
Lexus pes aerodinamiki garşylyga we öňki modeller bilen deňeşdirilende geçilýän menzili iki esse artdyrjak täze batareýalara eýe bolan LF-ZC sedanyny hödürlär. Şeýle-de, LF-ZL konsepti hödürlener – bu geljekde brendiň dizaýnynyň nähili boljakdygyny görkezýän kaşaň elektrik flagmany bolar.
Toyota hem bZ hataryny giňeltmegini dowam etdirýär. 2026-njy ýylda bZ7 sedany, şeýle-de kämil batareýalara eýe bolup, bir zarýadda 570 km çenli ýol geçip biljek täzelenen bZ4X krossoweri çykar. Mundan başga-da, umumy kuwwaty 338 at güýjüne deň bolan iki elektrik hereketlendirijili C-HR+ elektrik krossoweri işlenip taýýarlanýar.
Täze modelleriň ählisi Google hyzmatlary bilen multimediýa ulgamyna, täzelenen platformalara we awtonom dolandyryş tehnologiýasyna eýe bolar. Awtomobiller hem global, hem ýerli bazarlar üçin niýetlener.
Strategiýa laýyklykda, Lexus 2035-nji ýyla çenli doly elektrik brend bolar. Toyota 2026-njy ýyla çenli ýylda 1,5 mln elektromobil we 2030-njy ýyla çenli 3,5 mln çenli elektromobil satmagy meýilleşdirýär.
