Honda 2027-nji ýyldan başlap kämilleşdirilen güýç gurluşly 13 sany gibrid awtoulag modelini dünýä derejesinde satuwa çykarar. Täze ulgam ýokary çekijiligi we özüne düşýän gymmatynyň arzandygy bilen tapawutlanýar.
Ulgam giň salonly we ulaldylan ýükdanly uly ulaglar üçin ýörite işlenip düzüldi. Gurluşy ilkinji bolup haýsy modelleriň aljakdygy entek belli däl. Şeýle-de bolsa, hünärmenler ilkinji çykyşyň Honda Pilot krossoweriniň indiki neslinde bolup biljekdigini çaklaýarlar. Bu modeliň häzirki wersiýasynyň gibrid görnüşi ýok.
Kompaniýa täze gibridleriň ýokary öndürijiligi we ekologiýa taýdan gowulandyrylan häsiýetnamasy bilen tapawutlanjakdygyny habar berdi. Olar üçin 1,5 we 2,0 litrlik benzinli hereketlendirijiler, şeýle hem uly gabaraly ulaglar üçin has güýçli gurluşlar işlenip düzülýär.
Mundan başga-da, täze gibrid ulgamy öndürmek 2023-nji ýylyň gibridleri bilen deňeşdirilende 30% arzan düşer.
