“Mançester Siti” häzirki möwsümiň ahyrynda kluby terk etjek toparyň kapitany, belgiýaly ýarymgoragçy Kewin de Brýoýneniň heýkelini oturdar. Heýkel “Etihad” stadionynyň girelgeleriniň birinde peýda bolar diýip, klubuň metbugat gullugy habar berdi.
Mundan başga-da, “Mançester Sitiniň” müdirler geňeşiniň başlygy Haldun Al-Mubarak futbolça bagyşlanan mozaikany açdy.
Premýer-liganyň 37-nji tapgyrynyň “Bornmuta” garşy oýny (3:1) belgiýaly oýunçy üçin öý stadionynda iň soňky boldy. Oýundan öň janköýerler “Şa Kew” ýazgyly banneri görkezdi.
Oýundan soň hoşlaşyk dabarasy geçirildi. Toparyň baş tälimçisi Hosep Gwardiola De Brýoýne bagyşlanan wideo görkezilende, duýgularyna erk edip bilmän, gözüni ýaşlady.
“Mançester Sitiniň” düzüminde geçen on ýylyň dowamynda De Brýoýne 420 oýna gatnaşyp, 108 gol geçirdi we 177 assist etdi. Klub bilen bilelikde alty gezek Angliýanyň çempiony boldy, iki gezek ýurduň Kubogyny utdy, bäş gezek Iňlis ligasynyň kubogyny we üç gezek Superkubogy aldy. Şeýle-de, ol Çempionlar ligasynda, UEFA-nyň Superkubogynda we Klublaýyn dünýä çempionatynda ýeňiş gazandy.
“Mançester – bu meniň öýüm. Men biziň klub, janköýer, topardaş bolup eden zadymyzy etmek üçin bu ýerde 10 ýyl sarp ederin diýip garaşmandym. Biz hemme zady gazandyk. Şäheri, kluby has ulaltdyk. Men döredijilikli, hyjuw bilen oýnamak isledim. Men futboldan lezzet almak isledim we hemmeleriň göwnünden turandyr diýip umyt edýärin. Klubdaky we ondan daşary ähli zatlar maňa kämilleşmäge itergi berdi. Meniň üçin bu oglanlar bilen oýnamak hormat boldy. Men köp sanly ömürlik dostlary gazandym” – diýip, oýunçy hoşlaşyk dabarasynda toparyň janköýerlerine ýüzlendi.
