Ýewropa ligasynyň finalynda “Tottenhem Hotspur” “Mançester Ýunaýtedi” 1:0 hasabynda utdy. Oýun Bilbaodaky (Ispaniýa) “San-Mames Barriýa” stadionynda geçirildi.
Ýeňiş goluny 42-nji minutda Brennan Jonson girizdi.
“Tottenhem” üçin bu 1984-nji ýyldan – UEFA-nyň Kubogyny alanyndan bäri ilkinji ýewrokubok baýragy boldy.
Belläp geçsek, “Tottenhem” soňky gezek 2008-nji ýylda kubok – Iňlis ligasynyň kubogyny gazanypdy. Şondan soň ol dört finalda utuldy: üç gezek – Liganyň kubogynda (2009, 2015, 2021) we bir gezek – Çempionlar ligasynda “Liwerpuldan” utuldy (2019).
Toparlaryň ikisi-de Angliýanyň premýer-ligasynda şowsuz möwsümi başdan geçirýär. Uly býujetlerine garamazdan, olar häzir çempionatda 16-njy we 17-nji orunlarda ýerleşýär. Bu soňky birnäçe ýylda iki toparyň hem iň ýaramaz netijesidir.
Ýewropa ligasyndaky ýeňiş “Tottenhemiň” indiki möwsümde Çempionlar ligasyna gatnaşmagyny üpjün etdi. Topar Ýewropa ligasynyň finalyndaky ýeňiş üçin 6 mln ýewro gazandy. Ýaryşa gatnaşandygy üçin klubuň umumy girdejisi 31,6 mln ýewro boldy. “Mançester Ýunaýted” 25,9 mln ýewro gazandy.
Toparlaýyn tapgyra gatnaşandygy üçin her bir klub UEFA-dan 4,31 mln ýewro, toparlaýyn tapgyrdaky oýunda gazanan ýeňşi üçin 0,45 mln ýewro, deňme-deňlik üçin 0,15 mln ýewro gazanýar. Toparlaýyn tapgyrda ilkinji bäşlige giren toparlar, takmynan, 2,5 mln ýewro aldy, final üçin pleý-offda klublar, takmynan, 16 mln ýewro gazandy.
UEFA-dan pul baýragynyň möçberi boýunça “Tottenhem” 24-nji orny, “MÝ” 28-nji orny eýeledi. Bu görkezijiler boýunça olar Çempionlar ligasynyň pleý-offuna geçip bilmedik ýa-da 1/16 final tapgyrynda ýaryşdan çykan toparlaryň arasynda ýerleşýär.
Deňeşdirmek üçin: Çempionlar ligasynyň finalyna çykan “Inter” eýýäm 100,6 mln ýewro, aýgytly oýunda onuň garşydaşy “Pari Sen-Žermen” 93,2 mln ýewro gazandy.
