Alberto Jakomettiniň "Uly inçe kelle" ady bilen hem tanalýan "Diýegonyň uly kellesi" heýkeline Nýu-Ýorkdaky Sotheby’s auksion öýünde alyjy tapylmady. 70 million dollar diýip goýlan başlangyç bahasy gaty gymmat görüldi diýip, New York Post ýazýar.
Bürünç býust modernist sungata bagyşlanan auksionyň merkezi obýekti boldy. Heýkel 1955-nji ýylda ýasalyp, alty guýmanyň biridir. Ondan öň, 2013-nji ýylda Jakomettiniň şuňa meňzeş sungat işi 50 million dollara satylypdy.
Hünärmenler satuwyň şowsuz bolmagy sungat bazarynyň ýokarky böleginde ýagdaýyň kyndygyna şaýatlyk edip biler diýip hasaplaýarlar. Hatda meşhur suratkeşleriň ykrar edilen eserlerine hem mydama ýokary bahadan satyn aljak alyjy tapylyp durmaýar.
Býustda suratkeşiň dogany, köplenç, onuň öňünde durup nusga bolan Diýego Jakometti şekillendirilen. Heýkeliň beýikligi 65 santimetre ýetýär we bu ussadyň iň uly göwrümli eserleriniň biridir. "Uly inçe kelle" ady duýuş aýratynlygy bilen baglanyşykly: öň tarapdan seredeňde ýüzi inçe we süýnmek, tekiz diýen ýaly görünýär, profilde bu täsir ýitip gidýär.
Jakomettiniň eserlerine, adatça, uly isleg bildirilýändigini bellemelidiris. 2015-nji ýylda onuň “Barmak çommaltýan adam” heýkeli Christie’s satuwynda 141,3 million dollara satyldy, bu heýkel üçin rekord baha. 2010-njy ýylda “Ýöräp barýan adam” Sotheby's-de 104 million dollardan satyldy, bu hem şol döwür üçin rekorddy.
