France Football žurnaly tarapyndan ýylyň iň gowy futbolçysyna berilýän “Altyn top” baýragynyň gowşurylyş dabarasy 2025-nji ýylyň 22-nji sentýabrynda Parižde geçiriler. Bu barada baýragyň X sosial ulgamyndaky resmi sahypasynda habar berilýär.
Baýrak üçin dalaşgärler awgust aýynyň birinji ýarymynda yglan ediler. Şeýle-de, 2025-nji ýylyň dabarasynda ilkinji gezek zenanlar futbolynda iň gowy derwezebana, iň gowy ýaş oýunça we iň gowy hüjümçä baýraklar berler. Şeýlelikde, erkekler we zenanlar futbolynda baýraklaryň sany deň – hersinde alty baýrak bolar.
“Altyn top” 1956-njy ýylda France Football tarapyndan Ýewropada ýylyň iň gowy futbolçysyna baýrak hökmünde döredildi. 2010-njy ýylda Halkara Futbol Federasiýasy (FIFA) we žurnal “Altyn top” bilen “FIFA ýylyň oýunçysy” baýraklarynyň birleşdirilýändigini yglan etdi. 2016-njy ýylyň sentýabrynda France Football FIFA bilen hyzmatdaşlygy bes etdi. Indi 2024-nji ýyldan bäri neşir Ýewropanyň Futbol Assosiasiýalarynyň Birleşigi (UEFA) bilen hyzmatdaşlyk edýär.
