“Benfikanyň” hüjümçisi Anhel Di Mariýa Lissabon klubunyň çempionatdaky şowsuzlygyna teswir berip, özüniň topardan gitjekdigini mälim etdi. Ýatlap geçsek, aýgytly göreşde “bürgütler” çempionlygy “Sportinge” bermeli boldy.
“Bu biziň çempionatda islän netijämiz däl. Biz maksadymyza ýetmek üçin köp zähmet çekdik. Şeýle uzak ýyldan soň ähli zady şeýle tamamlamak gaty agyr. Bu meniň bu köýnekçede çempionatda iň soňky oýnum boldy we men ony geýip bilendigime buýsanýaryn. Öňümizde ýekşenbe güni final bar, biz oňa ýeňmek üçin umyt bilen çykarys. Hemişekisi ýaly, bilelikde. Goldawyňyz üçin minnetdar, “Benfikanyň janköýerleri” – diýip, Di Mariýa sosial ulgamlarda ýazdy.
Häzirki wagtda Di Mariýanyň karýerasyny nirede dowam etdirjekdigi belli däl. KHBS oňa “Inter Maýaminiň” gyzyklanma bildirýändigini habar berýär. Çeşmäniň maglumatlaryna görä, amerikan kluby futbolçy bilen 24-nji iýula çenli şertnama baglaşmak isleýär.
25-nji maýda “Benfika” we “Sporting” Portugaliýanyň Kubogynyň finalynda duşuşar.
Ýatlap geçsek, şenbe güni “Benfika” Portugaliýanyň çempionatynyň jemleýji 34-nji tapgyrynda “Braga” bilen oýnady. 37 ýaşly argentinalynyň assisti topara ýeňiş gazanmaga kömek etmedi, oýun 1:1 hasabynda tamamlandy. Ugurdaş oýunda “Sporting” “Witoriýany” utup (2:0), “Benfikadan” iki utuk öňe geçdi we ýurduň çempiony boldy.
