Kataryň «Qatar Airways» döwlet awiakompaniýasy «Boeing» amerikan konserni bilen 160 uçar satyn almak boýunça 200 mlrd dollarlyk şertnama baglaşdy. Bu barada ABŞ-nyň prezidenti Donald Tramp Dohadaky gol çekiş dabarasynda habar berdi.
«Bu Boeing-iň taryhyndaky iň uly uçar sargydy we bu gaty gowy. 200 mlrd dollardan gowrak we 160 uçar – bu ajaýyp» — diýip, «Reuters» agentligi prezidentiň sözlerini getirýär.
Bu habaryň yzýany, çarşenbe günündäki söwdalarda awiagurluşyk kompaniýasynyň paýnamalarynyň bahasy 1,6% ýokarlandy. Şu ýylyň başyndan bäri bolsa, paýnamalarynyň gymmaty 16,8% artdy.
Şertnama Tramp bilen Kataryň emiri Tamim bin Hamad Al Taniniň gatnaşmagynda gol çekildi. Şertnamanyň jikme-jiklikleri, şol sanda uçarlaryň modelleri heniz mälim edilmedi. Häzirki wagtda «Qatar Airways» awiakompaniýasynyň awiaparkynda 238 uçar bar.
Donald Tramp Ak Tama gaýdyp geleninden soň, 14-nji maýda ilkinji daşary ýurt saparynyň çäginde resmi sapar bilen Katara bardy. Duşuşygyň dowamynda, iki ýurduň liderleri 1,2 trln dollarlyk ykdysady hyzmatdaşlyk şertnamasyna hem gol çekdiler.
