Samsung kompaniýasy täzelenme ýygylygy 500 Gs bolan dünýäde ilkinji OLED oýun monitoryny hödürledi. Täze gurluş Odyssey OLED G6 hataryna degişli bolup, G60SF adyny aldy.
Model diňe kümüşsöw reňkde we 27 dýuým diagonal bilen elýeterli bolar. Yzky panelde RGB yşyklandyrmasy hem göz öňünde tutuldy.
Samsung Odyssey OLED G6 G60SF ekranynyň esasy aýratynlyklary:
- ·Matrisa – QD-OLED;
- ·2560×1440 piksel durulyk;
- ·Reaksiýa wagty – 0,03 ms (GTG)
- ·Iň ýokary ýagtylyk – 1000 nit;
- ·VESA DisplayHDR True Black 500 şahadatnamasy;
- ·Pantone Validated şahadatnamasy;
- ·Nvidia G-SYNC Compatible goldawy;
- ·AMD FreeSync Premium Pro goldawy.
Kompaniýanyň maglumatlaryna görä, bu täzelenme ýygylygy 500 Gs bolan dünýäde ilkinji OLED monitordyr. Bu onuň şekili sekuntda 500 gezek täzeläp bilýändigini aňladýar. Öndürijiniň beýanynda şeýle diýilýär:
“Biz oýun öndürijiligini, wizual hili we oýun dünýäsine aralaşmagy düýbünden täze belentliklere çykarmak bilen, dünýädäki geýmerler üçin ekranlaryň täze neslini hödürleýäris”.
Deslapky sargyt Samsung-yň resmi saýtynda eýýäm açyk. Gurluşyň bahasy 200 dollar arzanladyş bilen 1488 dollara barabar. Ol müşderilere 18-nji maýda iberilip başlanar.
Ilkibaşda monitor Singapurda, Tailandda, Wýetnamda we Malaýziýada satuwa çykar. Onuň dünýä bazaryna hem şu ýylyň dowamynda çykmagyna garaşylýar.
