Los-Anjelesiň Ýadygärlik kolizeýi we Inglwuddaky stadion 2028-nji ýylyň tomusky Olimpiýa oýunlarynyň açylyş we ýapylyş dabaralary üçin esasy meýdança bolup hyzmat eder. Bu barada Halkara Olimpiýa komitetiniň (HOK) saýtynda habar berilýär.
Olimpiadanyň resmi açylyşy 14-nji iýulda bolar we birbada iki stadionda geçer. Kolizeý üçin bu eýýäm üçünji açylyş dabarasy bolar – ozal bu ýer 1932-nji we 1984-nji ýyllaryň Oýunlaryny kabul edipdi.
Ýakynda gurlan Inglwuddaky stadion bolsa şeýle çäräni ilkinji gezek geçirer.
Olimpiýa oýunlarynyň ýapylyş dabarasy 30-njy iýulda Ýadygärlik kolizeýinde bolar.
Şeýle-de, bu meýdançalarda geçjek sport dissiplinalary belli boldy. Ýadygärlik kolizeýinde ýeňil atletika boýunça ýaryşlar geçiriler. Inglwuddaky stadion bolsa wagtlaýyn sportuň suw görnüşleri üçin taýýarlanar.
HOK tomusky Paralimpiýa oýunlarynyň hem açylyş dabarasynyň 15-nji awgustda Inglwuddaky stadionda geçiriljekdigini habar berdi. Paralimpiadanyň ýapylyşy 27-nji awgustda Los-Anjelesdäki Kolizeýde geçer.
