8-nji maýda Watikanda konklaw tamamlandy. Täze Rim papasy hökmünde Çikagodan (ABŞ) Robert Frensis Prewo saýlandy. Ol taryhda 267-nji papa boldy we özüne Şir XIV adyny aldy.
Täze papanyň saýlanandygy Sikstin kapellasynyň üçegindäki turbadan ak tüsse goýberilmegi bilen yglan edildi – bu dalaşgärleriň biriniň kardinallardan zerur ses sanyny alandygynyň we täze papa bolmaga razy bolandygynyň alamatydyr.
The New York Times gazetiniň habar bermegine görä, Robert Prewo Rim-katolik buthanasynyň başynda ilkinji amerikan boldy.
Täze papa Şir XIV-niň wepalylara ýüzlenen ilkinji sözleri “Parahatçylyk size” boldy.
Papa Şir XIV-niň ABŞ-da doglandygyna garamazdan, ol italýan we ispan dillerinde gürleýär, ýöne iňlis dilini bilmeýär diýip, NYT neşiri belleýär. Reuters agentligi bolsa, tersine, onuň iňlis, ispan, italýan, fransuz we portugal dillerinde gürleýändigini habar berýär.
Öňki pontifik, papa Fransisk 21-nji aprelde insult sebäpli 88 ýaşynda aradan çykdy. Ol 26-njy aprelde jaýlandy, onuň tabydy bolsa Santa-Mariýa-Majore bazilikasynyň mazarynda ýerleşdirildi. Ol buthana 2013-nji ýyldan bäri ýolbaşçylyk edipdi.
Konklaw 7-nji maýda agşam öz işine başlady we bir günden gowrak wagt dowam etdi. Papany saýlamak üçin dört gezek ses bermeli boldy.
Saýlawlarda ýeňiş gazanmak üçin bolsa papa sesleriň azyndan üçden ikisini (bu gezek mümkin bolan 133 sesden 89) almalydy. Papa Fransiski, Benedikt XVI-ny we Ioann Pawel II-ni saýlan öňki konklawlar iki-üç gün dowam etdi. Taryhda iň uzak dowam eden konklaw XIII asyryň ikinji ýarymynda bolup, tas üç ýyla çekdi.
