ABŞ-nyň Prezidenti Donald Tramp 8-nji maýy Ikinji jahan urşunda gazanylan Ýeňiş güni diýip yglan etdi. Resminama Ak tamyň web sahypasynda çap edildi.
Jarnamada şol gün amerikanyň halkynyň gurban bolanlaryň hemmesini hatyralap sarpalaýandygy hem-de Amerikanyň Birleşen Ştatlarynyň we dünýäniň howpsuzlygyny, azatlygyny we abadançylygyny goramak borjuna wepalylygyny tassyklaýandygy aýdylýar.
"Bu gün biziň ýurdumyz soýuzdaş güýçleriň milletçi-sosializmden we faşizmden üstün çykmagynyň 80 ýyllygyny buýsanç bilen belleýär. Ikinji jahan urşunda gazanylan ýeňiş güni biz Amerikanyň ýaragly güýçleriniň deňsiz-taýsyz güýjüni we kuwwatyny baýram edýäris we azatlyga bolan mukaddes hukugymyzy ähli daşarky we içerki howplardan goramaga borçlanýarys” – diýip, resminamada aýdylýar.
ABŞ 1941-nji ýylyň dekabrynda Ýaponiýa Pýorl-Harbora çozandan soň söweşe girdi. Ondan öň 1939-njy ýyldan başlap Ýewropa ýurtlarynyň aglabasy, şeýle hem 1941-nji ýylyň 22-nji iýunynda söweşe giren Sowet Soýuzy Germaniýa garşy göreşýärdi.
Jarnamada Amerikanyň Birleşen Ştatlarynyň urşuň dowamynda 250 000 töweregi adamy ýitirendigi aýdylýar. Trampyň sözlerine görä, şol pidalar bolmasa, "uruşda ýeňiş gazanyp bolmazdy" we dünýä "düýbünden başgaça görnerdi".
Resminamada 1945-nji ýylyň 8-nji maýy Germaniýanyň gürrüňsiz boýun egdirilendigini, şeýle hem "uzak dowam eden, rehimsiz we gan döküşikli urşuň soňunyň gelendigini" alamatlandyrýar diýip görkezilýär.
Faşistik Germaniýanyň gürrüňsiz boýun egdirilendigi baradaky akta 8-nji maýda Berlinde ýerli wagt bilen sagat 22:43-de gol çekildi. Gündogar Ýewropanyň aglaba böleginde, şol sanda Moskwada, şol wagt täze güne - 9-njy maýa geçilipdi. Ikinji jahan urşy biraz gijräk, 1945-nji ýylyň 2-nji sentýabrynda Ýaponiýanyň boýun egdirilendigi hakyndaky akta gol çekilenden soň tamamlandy.
