Xiaomi kompaniýasy Mix smartfonlarynyň hataryna gaýdyp gelmäge taýýarlanýar. Bu barada hytaýly insaýder Digital Chat Station habar berdi.
Onuň maglumatlaryna görä, kompaniýa täze Xiaomi Mix 5 modeliniň önümçiligine taýýarlanyp başlady. Smartfon seriýanyň öňki gurluşlary ýaly ekranasty frontal kamera we çarçuwasyz dizaýna eýe bolar.
2016-njy ýylda çykarylyp başlanan Mix hatary innowasion çözgütler bilen tapawutlanýar. Mysal üçin, Xiaomi Mix 1 ekranyň aşaky böleginde frontal kamera bolan ilkinji smartfon boldy. Xiaomi Mix 3 iki frontal kamerany we çarçuwasyz dizaýny hödürledi. 2021-nji ýylda çykan soňky model Xiaomi Mix 4 brendiň ekranasty kamera eýe bolan ilkinji gurluşy boldy.
Insaýder Xiaomi-niň birnäçe ýyl bäri ekranasty kamera tehnologiýasyny kämilleşdirýändigini belleýär. Şeýle kameralaryň esasy meselesi pikselleriň dykyzlygynyň pesligi sebäpli bellibir burçlarda obýektiwiň görünmegidir. Kompaniýa frontal kameranyň düýbünden görünmezligi üçin, bu kemçiligi aradan aýyrmagyň üstünde işleýän bolsa gerek.
Digital Chat Station Xiaomi Mix 5-iň çykmak ähtimallygyny 98% diýip hasaplaýar. Smartfonyň çykjak senesi heniz belli däl. Insaýderiň aýtmagyna görä, bu soňky ýyllarda Xiaomi-niň SU7 elektromobiliniň çykmagy bilen bir hatarda iň möhüm taslamalarynyň biri bolar.
