Parižiň “PSŽ” kluby Londonyň “Arsenalyny” utup, Çempionlar ligasynyň finalyna çykdy. 1/2 finalyň jogap oýny Fransiýanyň paýtagtyndaky “Park de Prens” stadionynda geçirildi we ýer eýeleriniň 2:1 hasabynda utmagy bilen tamamlandy.
27-nji minutda parižlileriň ýarymgoragçysy Fabian Ruis hasaby açdy. Oýnuň ikinji ýarymynda, 69-njy minutda “PSŽ” penaltiden hasaby artdyrmak mümkinçiligini gazandy, ýöne garşydaş toparyň derwezebany Dawid Raýýa Witinýanyň urgusyny yzyna gaýtaryp, öz toparyna oýna gaýdyp gelmäge kömek etdi. Şeýle-de bolsa, ýene üç minutdan Pariž toparynyň oýunçylary goragçy Aşraf Hakiminiň goly bilen artykmaçlyk gazanyp bildi. Myhmanlar 76-njy minutda Bukaýo Sakanyň tagallasy bilen bir gol gazandy, ýöne ondan artyk gola güýçleri ýetmedi.
Iki oýnuň jemi boýunça 3:1 hasaby “PSŽ-ni” ýaryşyň finalyna çykardy. Aýgytly oýunda parižliler kubok ugrunda Milanyň “Interi” bilen bäsleşer. Ol bir gün öň “Barselonany” utupdy.
Final duşuşygy 1-nji iýuna geçilýän gije Mýunhendäki “Alýans Arena” stadionynda bolar.
“Pari Sen-Žermen” taryhynda ikinji gezek Çempionlar ligasynyň finalyna çykýar. 2020-nji ýylda topar Mýunheniň “Bawariýasyndan” utulypdy (0:1).
“Inter” Ýewropanyň esasy klub ýaryşynyň finalynda alty gezek oýnady we kubogy üç gezek – 1964, 1965 we 2010-njy ýyllarda galdyrdy. Soňky gezek ol “Bawariýany” utup (2:0), çempionlyk gazandy. 2023-nji ýylyň finalynda “Inter” kubogy “Mançester Sitä” aldyrdy.
