Soňky ýyllarda internet ulgamyna şahsy maglumatlaryň syzýan ýagdaýlary köp boldy. Cybernews-den gözlegçiler şeýle bazalardan 19 milliard paroly seljerip, şeýle netijä geldi: parollaryň 94%-i gowşak, bir görnüşli we aňsat bilinýärdi.
“Biz gowşak parollaryň gaýtadan ulanylmagy bilen ýüzbe-ýüz bolduk. Parollardan diňe 6%-i özboluşly bolup, bu köp sanly ulanyjylary hüjüm üçin gowşak edýär. Adamlaryň köpüsi üçin ýeke-täk gorag diňe iki şertli autentifikasiýa bolup galýar – eger ol, elbetde, işjeňleşdirilen bolsa” – diýip, Cybernews-den maglumat howpsuzlygy boýunça hünärmen Neringa Masiýauskaýte belledi.
Topar 19 milliarddan gowrak paroldan diňe, takmynan, 1,14 milliardyň özboluşlydygyny anyklady. “1234” ýaly ýönekeý parol 727 million gezekden köp ulanylypdyr. Köp ýagdaýlarda bu ulanyjylaryň gurluşy satyn alandan soň ilkibaşdaky sazlamalary üýtgetmeýändigi bilen baglanyşyklydyr.
Ulanyjylaryň aglabasy ulgamyň has gysga parol saýlamaga rugsat bermeýändigi üçin 8 ýa-da 10 nyşandan ybarat parollary ulanýar. Üstesine-de, parollaryň üçden biri diýen ýaly ýörite nyşanlar bolmazdan diňe setir harplardan we sanlardan düzülýär, bu hem hüjümler üçin gowşaklygy ýokarlandyrýar. Ýöne iň erbet tarapy, adamlar kezzaplar tarapyndan aňsatlyk bilen döwülýän bellibir sözleri ýa-da jümleleri ulanýar.
Iň meşhur parollar, köplenç, şu aşakdaky umumy sözleri öz içine alýar:
- ·Oňyn pikirler: söýgi (87 mln), Gün (34 mln), arzuw (6,1 mln), şatlyk (6,9 mln);
- ·Pop-medeniýetiň adalgalary: Mario (9,6 mln), Joker (3,1 mln), Betmen (3,9 mln), Tor (6,2 mln);
- ·Şäherler we ştatlar: Rim (13 mln), Dakota (1,2 mln), Tehas (1,1 mln), Karolina (1,9 mln)
- ·Azyk önümleri: pizza (3,3 mln), alma (10,7 mln), çaý (36 mln), apelsin (3,6 mln).
Masiýauskaýte ygtybarly parolyň 12 tötänleýin nyşandan ybarat bolmalydygyny belledi. Ýönekeý we ýatda galyjy sözler kezzaplara döwmek üçin ýeňillik döredýär.
