“Maklaren” toparynyň awstraliýaly sürüjisi Oskar Piastri 2025-nji ýyl möwsüminiň “Formula-1” çempionatynyň altynjy tapgyry bolan Maýaminiň Gran-prisiniň ýeňijisi boldy.
Ikinji orny onuň britaniýaly topardaşy Lando Norris eýeledi. Üçlügi “Mersedesde” çykyş edýän britaniýaly Jorj Rassell jemledi.
Häzirki dünýä çempiony, “Red Bulluň” sürüjisi Maks Werstappen pellehana dördünji bolup geldi.
Piastri 131 utuk bilen çempionatyň umumy sanawynda birinji orny eýeleýär. Ikinji orunda topardaşy Norris (115), üçünji orunda soňky dört möwsümde dünýä çempionatynyň ýeňijisi bolan Werstappen (99) ýerleşýär.
Konstruktorlaryň kubogynda “Maklaren” öňde barýar (246 utuk). Şeýle-de, öňdebaryjylaryň üçlügine “Mersedes” (141) we “Red Bull” (105) girýär.
Dünýä çempionatynyň ýedinji tapgyry 16-18-nji maýda Imolada (Italiýa) geçiriler.
