Meta resmi taýdan özbaşdak Meta AI programmasyny işe girizdi. Ozal emeli aň Facebook, Instagram, WhatsApp we Messenger programmalarynda elýeterlidi, indi bolsa ony ýörite programmanyň üsti bilen ulanmak bolýar.
Kömekçi Llama 4 modeliniň esasynda işleýär. Ol ulanyjy bilen ses aragatnaşygy üçin niýetlenendir. Programma jogaplary şahsylaşdyrmak üçin esasy maglumatlary soraýar. Kompaniýa gürrüňdeşligiň “tebigy” we “ýönekeý” boljakdygyny aýdýar.
Meta AI beýleki hereketler wagty fon režiminde-de ulanylyp bilner. Ses funksiýalaryndan başga-da, programma tekst we ses buýruklary esasynda şekilleri döretmegi we redaktirlemegi goldaýar.
Kömekçi internetde maglumat gözläp, harytlary teklip edip, gözleglerde kömek edip bilýär. Programmada “gürrüňdeşligiň başlangyjy” funksiýasy bar – ol EA bilen gürleşmek üçin pikirleri teklip edýär.
Kömekçiniň işini şahsylaşdyrmak üçin Meta öz sosial ulgamlaryndan alnan maglumatlary ulanýar. Ol ulanyjy baradaky maglumaty ýatda saklaýar we jogap düzende Facebook-daky ýa-da Instagram-daky işjeňligi göz öňünde tutýar.
Programmada Discover lentasy elýeterli bolup, bu ýerde beýleki ulanyjylaryň “ýüzlenmeleri” jemlenýär. Bu emeli aňyň mümkinçiliklerini ýene nähili ulanyp boljakdygyna düşünmäge kömek edýär.
Meta AI eýýäm iOS-a we Android-e ýükläp almak üçin ABŞ-da, Kanadada, Awstraliýada we Täze Zelandiýada elýeterlidir.
