Bugatti kompaniýasy Jacob & Co. bilen bilelikde içinde V16 hereketlendirijisiniň kiçijik modeli bolan goşar sagadyny çykardy.
Bu mehanizm ýönekeý bir bezeg däldir – ol Tourbillon giperkarynyň hakyky hereketlendirijisiniň işleýşini görkezýär. Titandan ýasalan 16 silindriň ählisi kiçijik tirsekli wal bilen herekete getirilýär. Hereketlendirijiniň işi 20 sekunt dowam edýär we bu aralykda porşenler ýokaryk hem aşak hereket edýär. Tutuş sagat blogy ýakutdan ýasaldy.
Sagatlar her 30 sekuntdan aýlanýan turbiýon bilen üpjün edildi. Bu diňe bir takyklygy ýokarlandyrmak üçin däl, eýsem wizual effekt üçin edildi: turbiýon korpusyň dury böleginden görner ýaly ýagdaýda oturdyldy.
Wagt hem üýtgeşik görkezilýär: sagat dilleri spidometrdäki ýaly duga boýunça hereket edýär we her sagatda hem minutda başyna gaýdyp gelýär. Aýratyn siferblatda mehanizmiň tow derejesi görkezilýär. Doly tow 48 sagada we 20 gezek hereketlendirijini işletmäge ýetýär.
Korpus giperkaryň formasyny gaýtalaýar: radiator gözenegi, gapdal aýnalary we howa ýygnaýjylaryny ýada salýan elementler bar. Ölçegi – 52x44 mm, ýogynlygy – 15 mm. Içinde 557 sany elde ýygnalan detal bar. JCAM55 mehanizmine elde tow berilýär, wagt bolsa yzky panelde gizlin düwme arkaly sazlanýar.
Sagatdan jemi 150 nusga çykarylar. Olaryň her biriniň bahasy 340 müň dollar bolar.
