ABŞ-da mart aýynda jaýlaryň satuwlary fewral aýy bilen deňeşdirilende 5,9% peseldi. Bu barada ABŞ-nyň Gozgalmaýan emläk söwdagärleriniň milli assosiasiýasynyň (NAR) çap eden maglumatlarynda aýdylýar. Bu ýagdaý 2022-nji ýylyň noýabr aýyndan bäri, ABŞ-nyň gozgalmaýan emläk bazaryndaky iň uly aýlyk pese gaçyş boldy. «The Wall Street Journal» tarapyndan geçirilen soralşykda ykdysatçylar diňe 3,1% peselme bolar diýip garaşýardylar.
Mart aýynda ABŞ-da jemi 4,02 million jaý satyldy. Şol bir wagtyň özünde, ýurduň gozgalmaýan emläkleriniň ortaça bahasy geçen ýylyň mart aýy bilen deňeşdirilende 2,7% ýokarlandy we mart aýlary üçin rekord derejä ýetip, 403,7 müň dollar boldy. Satylmadyk jaýlaryň sany bolsa diňe bir aýyň dowamynda 8,1%, 2024-nji ýylyň mart aýy bilen deňeşdirilende bolsa 19,8% artdy.
Satuwlaryň şeýle çynlakaý derejede pese gaçmagy – amerikalylaryň ykdysadyýetiň ýagdaýy babatynda aladaly pikirdediklerini we ýakyn geljekde ýagdaýyň has hem agyrlaşmagyndan howatyrlanýandyklaryny görkezýär. Adatça, ýaz pasly jaý satyn almak üçin iň gyzgalaňly möwsüm hasaplanylýar, sebäbi ýaş çagaly maşgalalar tomusda täze öýe göçmek isleýärler.
«Mart aýynda jaýlaryň satuwlary-da, satyn alnyşy-da pes derejede galdy. Munuň sebäbi ýokary ipoteka göterimleri bilen bagly gozgalmaýan emläkleriň elýeterli bolmazlygydyr» — diýip, NAR-yň baş ykdysatçysy Lourens Ýun aýtdy.
Assosiasiýa görä, soňky aýlarda ipoteka göterimleri 6,5%-den ýokary, bu bolsa öý almak isleýän potensial alyjylary yza tesdirýär.
