Garward uniwersitetiniň gaznasy ABŞ-nyň prezidenti Donald Tramp bilen ýüze çykan düşünişmezlikler sebäpli, takmynan, 1 milliard dollarlyk hususy maýa goýum gaznasyndaky paýnamalaryny satmak boýunça gepleşikleri alyp barýar. Bu barada çeşmelerine salgylanyp, «Bloomberg» agentligi habar berýär.
Harvard Management Co. we Jefferies Financial Group Inc. bu portfeli Lexington Partners kompaniýasyna geçirmek ugrunda işleýär. Çeşmeleriň aýtmagyna görä, Lexington bu şertnama üçin başga hyzmatdaşlary hem çekip biler. Şertnamanyň şertleri heniz gutarnykly kesgitlenmedi we üýtgäp biler. Ikinji bazar portfeliniň satylmagyna 2024-nji ýylda başlanylypdy.
Mundan ozal, Donald Trampyň administrasiýasy Garward uniwersitetine berilýän 2,2 mlrd dollarlyk grantlary togtadypdy. Garward bolsa jogap hökmünde hökümete garşy kazyýete ýüz tutdy. Munuň yzýanynda, Tramp salgyt gullugyna ýüzlenip, uniwersiteti «syýasy gurama» hökmünde klassifikasiýa etmegi teklip etdi. Sebäbi, bu ýagdaý uniwersitetiň maliýe ýagdaýyna we serişdeleri ýygnamak mümkinçiliklerine zarba urup biler. Garward bolsa mart aýynda işe kabul edişligi doňdurdy we şu aýyň dowamynda, 750 million dollarlyk obligasiýa satdy.
