Honda kompaniýasy 2014-2020-nji ýyllar aralygynda öndürilen 152 müň 573 sany «Acura MDX» krossowerini täzeden yzyna çagyrýandygyny mälim etdi. Sebäp – yzky çyralara çyglylygyň aralaşmagy. Bu mesele 2019-njy ýylda düzedilmäge synanyşylypdy, ýöne gaýtadan ýüze çykdy: öň bejerilen awtoulaglaryň yzky çyralary hem ýene-de buglanýar we işlemegini bes edýär. Häzirki wagta çenli şol bir näsazlyk sebäpli, 4 müňden gowrak şikaýat hasaba alyndy. Bu barada «Cars.com» habar berýär.
Geçirilen barlaglaryň netijesine görä, kemçilik çyralary üpjün edýän North American Lighting kompaniýasynyň ýalňyşlygy sebäpli ýüze çykypdyr. Çyranyň korpusy bilen uplotniteliň arasy gowy möhürlenmändir. Şonuň netijesinde, çyglylyk içine aralaşyp, poslamany döredýär we ýagtylygyň işlemegine päsgel berýär. Bu mesele Alabamadaky we Ogaýodaky zawotlarda 2012-nji ýylyň oktýabry bilen 2020-nji ýylyň dekabry aralygynda öndürilen ulaglara degişlidir.
Honda kompaniýasy yzky çyralary çalşyp bermegi, uplotnitelleri täzeden ýerleşdirmegi we elektrik kabelleriniň gurluşyny döwrebaplaşdyrmagy wada berýär. Bularyň ählisi awtoulag eýeleri üçin mugt bolar. Bejergini öz hasabyna geçiren müşderiler çykdajylary üçin öwez tölegini hem alyp bilerler. Şeýle-de täze oturdyljak detallar giňeldilen kepillik bilen üpjün ediler.
«MDX» modeli ABŞ-da Acura brendiniň esasy ulaglarynyň biridir. 2024-nji ýylda bu modelden 50 müňden gowrak satyldy, 2025-nji ýylyň diňe ilkinji üç aýynda bolsa, eýýäm 10 müňden geçdi. Öndüriji kompaniýa şeýle ýagdaýlaryň geljekde gaýtalanmazlygy üçin, hil gözegçiligini güýçlendirmegi maksat edinýändigini aýtdy.
