“Realyň” we Braziliýanyň milli ýygyndysynyň oýunçysy Winisius Žuniora futboldan iki ýyl çetleşdirilmek howpy abanýar. Tuttosport-yň we italýan žurnalisti Žanluka di Marsionyň berýän maglumatyna görä, FIFA futbolçynyň birnäçe futbol klublarynyň eýesi bolmak bilen guramanyň ahlak kadalaryny bozýan bolmagynyň mümkindigi bilen bagly iş geçirýär.
Muňa Braziliýanyň “Atletiko San-Žuan-del-Reý” klubunyň paýlarynyň 16,5 göterimine eýeçilik edýän Tiberis Holding do Brasil kompaniýasynyň şikaýaty sebäp boldy. Kompaniýa Winisius özi bilen baglanyşykly ALL Agenciamento Esportivo kompaniýasynyň üsti bilen “Atletikonyň" paýynyň gözegçilik bukjasyny gös-göni alandygyny we Tiberis kompaniýasyny söwdada artykmaçlykdan peýdalanmak hukugyndan mahrum edendigini öňe sürýär.
Şeýle hem FIFA Winisiusyň Portugaliýanyň “Alwerka” klubuna bikanun eýeçilik etmegi bilen baglanyşykly maglumatlary derňeýär.
Şikaýat FIFA-nyň Ahlak kadalary komitetiniň derňew palatasyna berildi. Arza berijiniň pikirine görä, bu ýagdaý bähbitleriň gapma-garşylygyny görkezip biler we guramanyň kadalaryny bozýar.
Çeşmeleriň berýän maglumatyna görä, ALL Agenciamento Esportivo kompaniýasy oýunçynyň kakasy we wekili Tassilo Soareş tarapyndan dolandyrylýar eken.
24 ýaşly Winisius 2018-nji ýyldan bäri Madridiň “Realynda” çykyş edýär. Bu möwsümde ol 46 oýun oýnady, 20 gol geçirdi we 14 gezek netijeli pas berdi.
